برمظان 2

جميع الناس بيحضرو باب الحارة و ىبيسبو عليه على اساس مش عاجبهم

معظم البنات بيكرهو حليمة بولند و مقهورين منها أبصر ليش

كل المحلات بالأسواق الشعبية بتبيع عصير و قطايف , حتى محلات الملابس و الكراجات

أول يوم برمضان بتروح على صلاة الفجر بيكون الجامع زي صلاة الجمعة وبعد نص رمضان بيرجع صفين بالكثير

جميع فئات الشعب الأردني بدها قهوة وخرمانة على سيغارة ونص نايمة

كل الناس ما بتشتغل بتعريفة و نفسها تعطل و ما في على لسانها غير , لازم يعطلونا برمضان زي السعودية

المطاعم بتشتغل عشر أضعاف الأيام العادية مع انو المفروض في طبيخ و أكل بالبيت

الناس العادية بتطلع من الشهر معهاش تاكل و بتضل ترقع لرمضان اللي بعدو والتجار الكبار بيطلعو بمليين بتكفيهم لرمضان اللي بعدو

مسلسلات

من أمتع الأمور التقليدية برمضان, المضحكة المبكية
انو في كل قناة على التلفزيون بيجي خمسة وأربعين مسلسل ,
خمسطعش منهم خليجي كلو عياط وظلم ورجال شريرين حشاشين دايرين ورا النسوان
وخمسطعشر مسلسل مصري من بطولة الفنانات المصريات الختيارية اللي الوحدة منهم تجاوزت الأربعة وثمانين سنة
ك يزرا ومير فت"عدس" أمين و الغام شاهين وغيرهن واللواتي تجاوزتهن السينما ليأتونا بدور سيدات المجتمع ملائكة الرحمة والكاملات المتكاملات ولا تستغرب انو وحدة منهم تكون عاملة قرنين وتمثل انها طالبة مدرسة صف تاسع
وتتزوج ممثل عمرو اربعطعشر سنة يقع في دباديبها ويترك الأهل و الأقارب من أجل عيونها

و أربعطعشر مسلسل سوري نصهم من أبو شوارب و حارات شامية و مسبات و بهادل و حواجب احدعش , ناهيك عن

أغسلك أجريك ابن عمي؟
أنشفلك أجريك ابن عمي؟
ألبسك جرابات ابن عمي؟
تلعب برسيس ابن عمي؟
تلعب عليكي حيطة يا مستورة
يغسلوكي الاهي
امشي من هوون لرنك كف أنشفلك عروقك بنت عمي

طبعا بكون عشر عيل بالمسلسل كلهم بمثلو ببيت واحد بس كل ناس الهم كاميرا مثيتة من جهة, ما علينا
أهم اشي انها مسلسلات بدون قصة ولا حبكة ولا بتسوى شلن
يعني لو هالديكور والكلفة يلاقولهم قصة زي الناس فيها و ما فيها.. يرحم أيامك يا ابو عبدو وسيفو و أبو صطيف بأيام شامية
وبتلاقيلك النص التاني قالبينها شيكاغو وعصابات و أسياد المال والعار و تتجار بحكو بالمليارات , اييييشششششش في؟؟؟

و أهم اشي المسلسل الأردني الوحيد واللي بكون ما بيجي غير العصر على قناة الأردن واللي بكون دراما
المتعة بهالمسلسل انو بتحضرو مشان تضحك على التمثيل اللي بخزي . انو تمثيل؟ اصلا بكونو بمثلو انهم بمثلو , قصة تاااافهة و حوار ما بسوى تعريفة , والكل شادد على حالة
بيجيلك ممثل مخشب طول المسلسل ولاوي بوزو و بحكي و هو بتفرج على الكاميرا
طبعا المسلسل بكون انتاج واخراج وتمثيل و كتابة التلفزيون الأردني
عيب هيك مسلسلات تطلع على الفضائية

انا هلأ بتفرج على أحلى مسلسل برمضان , مسلسلات حليمة لأنها عنجد هيييييا اللي بتربح و ما بتزهق

برمظان

استيقظت من النوم مش عطشان مبدئيا لأنو تحديت العطش و صرت أشرب نص خزان مي مترين عالسحور , حتى فكرت أمد بربيش مي من الخزان داريركت لعندي و احط حنفية على طرفو , المهم انومش عطشان بس خرمان على فنجان قهوة لكن بتبتسم وبتقول رمظان كريم والخرم هاد متحمل
و انت تلف بالبيت بتلبس و بتجهز حالك بتسمع أصوات الشخورة والنوم العميق تصدح في أرجاء البيت
بتبتسم وبتفوت تاخدلك" شور" يعني دش, بس قبل ما تفوت بتلزق تمك مشان ما تهرب مي بالعقل
بتطلع وبتلبس اشي مزهزه كونها مزهزها معك و صاحي بدري

بتطلع من البيت لتتفاجأ انو عمك صافف سيارتو جنب سيارتك بلزقها بتروح بتفتح الباب بين السيارتين بس هات تقدر تطلع بالسيارة من السيق اللي بينهم
لا مفر من تصحاية عمك وقلق منامو مشان يفتحلك طريق , بتتجه لبيتهم بترن على الجرس أول مرة عالفاضي تاني مرة عالفاضي تالت مرة عالفاضي بتبلش تدق على الباب بهدوء على الفاضي طب بعدين؟ لازم تطلع , بتحاول ما تعصب و بتصير تخابط بالباب مشاان الله اصحو , لا حياة لمن تنادي , طبل طبل , بالأاااا خر بفتح الباب شوي شوي بطلع ابن عمك الصغير مفتح عين وحدة و زي اللي ماكل سبعين كف وفاتح تمو بتثاوب بوجهك , بحكيلك مين؟ وهو بتطلع عليك , مسكين شكلو بحلم , بتضطر تبتسم وبتقلو صباح الخير حبيبي ,
بحكي :صباح أمماأخخ النور
صحيلي عمي بالله يزيح سيارتو مشان مسكر علي
طيب
بروح الولد وبغطس
بعد برهة بطلع عمك , فاتح نص عينو اليمين , اهلين يا عمي تفضل
صباح الخير عمي بالله بدي بس تبعدلي سيارتك عندي شغل والله بدي أطلع
بطلق عمك مثاوبة من أبو دقيقتين وبقلك يللا يعمي
أخيرا انحلت المشكلة
مشان تروق الجو مرة ثانية بتقطف وردتين من جنينة عمك بدل غلبة وتعطيل
و بتطلع , اووووف السيارة مفاضية بنزين
بتسلك ولا ما بتسلك للكازية؟
بتضل على أعصابك لتوصل الكازية بتلاقيها فاضية
الموظفين مكومين جنب الكازية زي الشوالات ماخدين غفوة
زمر زمر زمر , أخيرا صحي واحد وأجاني جر
بكم بدك
عشرة بالله
بتثاقل شديد بلش يعبي
بتثاااوب بوجهك وهو يتناول العشرة
بسكر منافسك من ريحة تمو , ولكم شو بتتسحرو يخرب بيت اليهود

بتتابع طريقك لبيت خطيبتك بدك تفاجئها انك صاحي بدري و جاي توصلها
بتصف تحت وبتطلع من السيارة وبتستنى
في أثناء انتظارك
ولا هالزلمة بمر بسيارتو من جنبك وبرفع ايدو وهو ببتسم وبسلم عليك
مين هاد؟
يلا المهم انو مبتسم بترفع ايدك و بتسلم عليه
بعد شوي واحد جاي من وراك نص نايم
كيفك يا عريس , انت بتنقز طبعا وبتحكي بعبك , مين هاد ؟ ايش في
طبعا هو يدرك مفاجئتك و بحكيلك انا كنت بالجاهة قبل كم يوم , أهلا فيك
بتضحكلو وبتقلو أهلا الله يسعدك وانت بتدعي جواك انو ما يتثاوب كمان
المهم بتنزل خطيبتك , بتوصلها لشغلها بسعادة وماشالله بتروح على مكتبك

, هات تلاقي مصف
أول لفة بالشارع , تاني لفة بالشارع
وبما انو مسكرة مسكرة بتصف على بعد أربع عمارات و بتطرقها مشي
بتبتسم و بتقول المشي صحة
بتوقف المصعد و بتكبس ألف مرة و هو نايم فوق
طب انزل؟ابدا, انزل ولك, عالفاضي
بالأخر بنزل وبطلع منو واحد محمل المصعد عدة و بقعد ينزل فيها بتضطر تبعد نص كيلو مشان الغبرة
و بتطلع أخيرا
بوقف المصعد الطابق اللي بعدو
لما يفتح
بتلاقي مغارة قدامك
وهي عبارة عن شخص يتثاءب وهو واقف , من كثر ما ثمو كبير و بتثاوب بصوت عالي ما حس بالمصعد انو وقف شكلو
مشان تقطع عليه حبل مثاوبتو بتقلو طالع؟
بتسكر المغارة ذات النص متر قطرها
و بقلك لأ نازل
بتبسم بوجهو وبتكبس على كبسة الطلوع و انت مسدود نفسك
و بتتثاوب وبتلعن يوم الصحوة بدري

البقية لا تأتي

مطبات

أكيد هاي اللافتة التحذيرية مش قبل المطبين اللي قدام وزارة الداخلية وانت داخل على عرجان ولا قبل الطريق الفرعي اللي بدخل على مرج

الحمام بموازاة طريق البحر الميت

لأنو ببساطة عنا أحد فنون ورموز الأردن الأثرية هي المطبات وهناك تفنن واضح في عشوائيتها و أشكالها الغريبة عديمة الملامح فمنها المفلطح أو الهضبي الكبير أو الهضبي الصغير أو المربع! , ناهيك عن بعض مطبات شارع الغاردنز من ذوات الفتحة الوسطية أو الجورة ( هاي تمويه أو خدعة)

كل ما أكل مطب جامد بحس أمانة عمان حاطة لافتة بعدو مكتوب عليها صحتين وعافية على قلبك أو ممكن لافتة مكتوب عليها -في كراج قريب اذا بدك - والأحلى تلاقي لافتة ديجيتال فيها عداد كل ما تاكل مطب بحطلك " 1- 0 " لأمانة عمان و هيك

هلأ انا قررت أصير أنتبه للمطبات بس للأسف مش زابطة ,

في طريق طبربور -أبو عليا كنت رايح وصل صاحبي بالليل , المفروض طريق فاضي فماشي 80, فجأة صار هزة أرضية بجميع غرف السيارة بما فيهم شنتة الأغراض وحسيت عجال السيارة فلتو ,

ضربت بريك عنيف و خففت بعد الصدمة النفسية واحتمالية انقطاع الخلف عند صاحبي -لأنو ضيف مش متعود عالوضوع -أما احنا فا الله جبر زمان ,

ما أخذت نفس ولا مطب تاني على بعد مئة متر على شكل جبل ذو قمة (مبوز ) فا صحتين وعافية

طب مالها نظرية تحفير الشوارع وعمل شكلها بخزي و غير حضاري ؟ منيحة بتخفف السرعة و اذا سيارتك قديمة وصرت تسمع صوت الأحتكاك فما تهتم واسي حالك انو شارع الرينبو عنا هيك

معناها ما بلوم بياعين السيارات لما تفرق سعر السيارة الف دينار انها ماشية بالبلد أو لأ

فعلا مطبات والتسمية مش من فراغ ومش موقفة على مطبات الطرق أصلا

كل ما تتزنء

ئئلع

بعجبني بمجتمعنا الاردني مع اختلاف طبقاته ومداركه ْ ومنابته انهم متفقين على المبادئ والعادات

كان الي مشوار على سحاب فاا طلعت اول اشي على السابع و حبيت اروح من هناك طبعا لأنو الدنيا كانت شوب شفت اللي ما بنشاف

هلأ انو الينات ماشيين من غير هدوم هاد موضوع ما بنختلف عليه ما فيه مشاكل وشو ما لبسو حتى لو ما كان لبس يعتبر جيد مشان الشباب يتشجعو وتفقع معهم و يتجوزو على بكير

بس لفت نظري الشباب كانو دايرين يالشرتات والشببيح (جمع شباح)و عادي اللي طالع يشتري غراض واللي مع مرتو بالسيارة واللي قاعد بأرجل وماشالله الكل ئالع هدومه

فا انا حكيت يالله مهيه عمان الغربية , لما رحت على سحاب روحت من دوار الشرق الأوسط و لفيت بالوحدات و على وادي الرمم , فوجئت بنفس المناظر ( للشباب ) كمان شببيح و شرتات ماشالله اللي كان بيغسل الباص او البكم واللي قاعد على باب الكراج واللي حامل صحنين حمص بعز الضهر, مش مهم , أما البنات فما شفت بنات أصلا طوال فترة تجوالي هناك

لكن الفرق بين المشاهدتين كان واضح

بالنسبة للشرتات فشرتات شباب عمان الغربية ملونة ومقلمة وبتحسهم مشترينها ومنقينها بعناية لهيك مناسبات بس كان ناقص يحطولها كشكش اما شرتات شباب عمان الشرقية فكانت عبارة عن بنطلونات مقصوصة أو شرت بيجامة ابو تلت قطع او بنطلون مثني ليصبح شرت

الشببيح بعمان الغربية كانت أقرب الى البديات السوداء او الشببيح البيض ابو شيالات لكن من القطن الخالص
وشببيح عمان الشرقية من ابو نص ليرة مجعلك وفي بقع أكل وما أكل او شباح السيد الوالد لما صغر عليه او الله يرحمو

الفرق كمان بالأجسام المليانة والعضلات المفتولة لشباب عمان الجيم غربية وكمال العظام لشباب عمان الشرقية

المشاهد والمفارقة عجبتني لدرجة اني كلفت نفسي اقعد 10 دقايق اكتب هاد الثريد بالعربي
فتأمل يرعاك الله

..

نحاول التفكير في المكوث , نكره الرحيل
لا مكوث
نحب المكان , وفائنا يشدنا ويجعلنا نحارب لأجله ومن أجله
قوارب تجهزت وقوافل امتلأت بأوراق كتبناها على مدار عامين
لن ننتظر العاصفة لنتجنب الرحيل وقتها , بل سنرحل في أوجها
قد عهدنا العواصف وخبرنا الأمواج
نحترف المكوث ونحترف الرحيل
نبقى لنكون بين من هم نحن لنغادرهم ونغادرنا

حواري مع صديق

والأجساد تتكلم , لها لغة ومنطق , ولا ننكر عذب لغتها , الا أن النشوة تزول وتزول ذكراها معها كمن يكتب على رمال الشاطئ
ولغة الروح أقوى وأجمل , تدوم وتحكي ما لا يستطيعه الجسد
أهواها عندما أهوى روحها وأحب حبي للملاك الذي يسكنها

أقول اني أحببت وارتقيت ان عشقت روح وأني نزوت ودنوت ان عشقت جسد

تستبيح نفسي عبارات أججها عبير حديثنا عن الروح
,ماذا لو حوى القمر أحلى النجوم و زادته جمالا و رونق
ماذا لو وهبها الله جمالا ساحرا سكنته روح تقية,نقية
ماذا لو انساب حيائها و ملأ عليك دنياك , أغرقك
ماذا لو صارت ابتساماتها نجومك ,
مادا لو كان وجهها مرأة روحها العذبة , روح طاهرة , انثى .. كون
أوتأملت كونا تمثل بامرأة؟

لله در بطون عربية ما فتأت تهدينا نجمة تلو نجمة و زهرة تلو اخرى
هي كالجوهرة الثمينة , صعب منالها , يحويها صندوق مخملي فاخر
ما لمسته يد بشر
ترقد في القمم

لله در الفاتنات يهبنا حياة وأمل
عيون لا تغمض الا وهي عرينك , وقلب لم يفتح بغير عينيك
تأملتها؟

ان لم تجدها فاصنعها في خيالك علها تكون حوريتك في الجنة

لما كنت بالعراق

ذات صباح وأنا في بغداد صحيت على مسج من الجميلة بعمان بيقول صباحك سكر

ضحكت بس والله بيني وبين حالي عم بحكي مو ضحكتك يا صاحبي

احساسي غريب مش نايم الليلة مليح , فكر ووجع راس والتحديات بطلت تخلص

يلا شجابرك على المر غير الأمر منو, قمت أمشي بهداوة , غسلت بالبرد و انتهى المشوار بالمطبخ أعمل قهوةحطيت المي عالنار .. بس ما في سكر ,يا ويلي , نسيت اجيب معي البارحة , والعمل؟

دقيت باب الجار , طلعت قمر حافية القدمين كنها باقية بغرفة المكياج وقالت: شحلو هالطول , منو أنت ؟

شكرا , انا جاركم

منين انت؟

تارك اهلي ومغترب

تحكي جد؟

سالتها تحسبيني شخـص ثاني ؟

لا ياصديقي

تعجبت

قالت: على كلا ياهلا بهالطول

قلت: ميرسي وكلك ذوق

أوامر يا طيب

قلت بنفسي أااااخ , موحرام ما أغازلك بس بعد الحب منين أجيب احساس ؟

قطع الصمت صوت رجل من جوا يقول وعندك عين ؟؟

يتبع

الشب والأهل بعد كل عرس

الأخ الاكبر (متزوج) :شو ما شفتولنا عروس لأكس
الام:طبعا بس هو يقول بدي
الأخ الأصغر (متزوج) :طب هاتو لنشوف
"الشب:"مبتسم
الاخت ١: والله بنت فلان ما شالله عليها
الأم: اه والله وفي فلانة بنت فلان كمان ماشالله منيحة
"الشب:"فاتح تمو
الأب:يابا شوف وحدة من بنات عمك ماشالله دين واخلاق وجمال
الشب: يابا والله زي اخواتي كلهم
الاب:زي ما بدك يابا
الام : طب شو رأيك ببنت ابو فلان
الاخت٢: اه والله هاي بتجنن
الشب: مين هاي؟
الاخت ١: اللي شفناها يوم تخريج فلانه كان تخريجها وسلمنا عليهم
الشب: اها لا شايفين حالهم عالفاضي
الأب:والله انا بشوف نشوفلك وحدة من بنات عمك ماشالله دين واخلاق وجمال
"الشب:"خافف عقله
الاب:زي ما بدك يابا
الاب:هاتو هالعشا
الام : طب والله فلانه دمها خفيف وماشالله اهلها مناح
الاخت: لا اختها احلا لسه انا حبيتها اكثر
"الشب: "ابتسامة خبيثة
الشب: كيف شكلها بعرفهاش
الام: ممنوع تعرف لما تنوي
الشب: وفرتو
الاخ الاكبر : طب شوفولو وحدة من بنات ابو فلان الزلمة صاحب دين وما قصر معنا يوم قصة فلان
الاخ الاصغر: لا يزلمة عنده ابن ازعر
الشب: لول
الأب:هي بنات عمك ماشالله دين واخلاق وجمال وعمك بحبك
"الشب:"لا تعليق

الاب:زي ما بدك يابا
الاخت: طب والله فلانه كثير منيحة واهلها مناح وعليها العيون
الشب: ممكن سؤال؟
الاخ الاكبر: تفضل
الشب:مين قلكو اني بدور على عروس
الاخت: صحيح نسينا فلانه
"الشب:"بلش يلطم
الام: اه والله هاي متدينة واخلاقها عالية...
الاخت:..الخ
الام:...الخ
الاخت:..الخ
الام:...الخ
الأب:يابا شوف وحدة من بنات عمك ماشالله دين واخلاق وجمال
"الشب:"بللم
الاب:زي ما بدك يابا
موبايل اكس برن...
الشب: عن اذنكم، كملو كملو انتو

هوم ألون

اليوم : الجمعة
الحالة : اجازة
الاستيقاظ: في المساء 5 بي ام
وضع البيت : هدوء على غير العادة
الأهل: طالعين على اربد زيارة
السيارة: أخدو سيارتي
البناية : فارغة , رايحين رحلة

انقطعت في السبل في البيت في هذا اليوم الهاااااااااادي
تو ميك ات مش عادي

ال دي في دي : راش هور 3
التي في: ام بي سي
لابتوب: أغاني + شات
أرجيلة طبعا
و كاوبتشينو

فيتو تشيني

عالغداء كانو الشباب حابين يغيرو
فقررنا نطلب ايتاليان فوود
و رسى المزاد على اشي اسمو فيتو تشيني

انا كنت متردد لأنو ما بحب شكلو كتير و ما عمري دقتو من شكلو
المهم مع الاصرار والضغط قررت أكل ووصيت

اجا الفيتو تشيني
و بلشنا
الشباب نازلين عن جنب و طرف
أكلت أول لقمة
تاني لقمة
تالت لقمة

لزيز

رابع لقمة
نفس
سييب
خامس لقمة
نفس .. سيب
نفس .. سيب

بسسسس
حسيت حالي باكل كائنات حية مشوية بس عايشة
دسسسسسسسسسسسسسسسسسسسسم
و مش زاكي

ضربت سلف و على ووك الشميساني
شا ينييييييز شاورما ووك
على راس راااسي


أول اشي ايطالي ما بحبو

لأنو ما كنا ماكلينو قبل بس شكلو مش كل هالأد و نفسيتي منقرفة عالأكل

مورال اوف ذا ستوري: لا تجرب تاكل اشي انت مش مقتنع بشكلو

بي اس: طلع غدا اليوم ب 8 دنانير , يا بلاش

مين الكذاب؟

مبارح تأخرت بالشغل
فالصبح أعطيتها نومة للتسعة و أنا مداوم , تسعة وخمسة صحيت على رنة الموبايل
شب من التيم "عوعو " بحكيلي انو يا اكس انا بدي أتأخر لو بتسمحلي
أنا: خير في اشي؟
عوعو: والله رجعت دخت وبدي أشوف دكتور
أنا : سلامتك والله مش خبرية
طيب أجيك؟ " الشب أهلو مسافرين وعايش لحالو" ,
عوعو: لا مش مشكلة مشان الوقت أنا هلأ طالع
أنا: طيب اوكي بحكي أتطمن عليك واذا بدك أي اشي كلمني , واذا ضليت تعبان بلا ما تيجي اليوم , ارتاح
تسلم حبيبي
سلام
سلام

قمت لبست وطلعت عالشغل , وصلت المكتب عشرة وربع
مكتب عوعو فاضي , طبيعي لأنو تعبان
المشكلة مكتب شوشو كمان فاضي وهاد أنشط شب عندي بالتيم وعمرو ما تأخر عن الثمانية ونص دقيقة
واذا بدو يتأخر دقيقة بحكي تلفون أنا : صباح الخير شباب , شو وين شوشو؟!؟
ما اجا
اتصل؟
لا والله

أوك
رفعت هالتليفون ورن على شوشو
الصوت مخنق وغميق , والشب هاد انا بعرفو بشوش و دايما يضحك وينكت
أنا: شو وينك
شوشو: والله ا ابو الخل انا بالمغفر
أنا:له يا رجل, خير
شوشو: لا ما في اشي بسيطة
بس ضربت سيارة
انا: طب انت منيح ؟
أه تمام الحمدلله

هلأ ساعة زمان بكون عندك نشالله
أنا:طب بدك اشي, أجيك؟
لا لا بسيطة

و بعد دقيقتان كات المفاجئة!! في اشي غلط يبدو

ايش في؟

معضلة

ليلة جمعة طبيعية , على ال 11 وقت الأرجيلة , رحت ولعت الفحم و بدي أطلع أجيب معسل لأنو خالص
دور لطش على مفتاح السيارة
بح
دور دور دور بح
ما في مفتاح
نزلت على السيارة لقيت المفتاح بالسويتش
1- ما في معي سبير
2- الشبابيك مسكرات على الأخر ما في مكان لنملة
جربت 3 مفاتيح واحد منهم لسيارة نفس النوع والموديل على الفاضي

المعضلة مش انو ما في معسل دبرت معسل و عم بأرجل
المشكلة كيف بدي أفتح السيارة

هلوسات

نبيع موزا في سوق السكر و نشرب الشاي بكل شيء الا في أكوابه
كانت عيناي تراقب الدوران المتسارع لاحدى دواليب عربة من عربات الحمالة في احدى الأسواق القديمة ,أوقفنا ضوء أحمر توهج من احدى اشارات المرور على جانب طريق ليس بحاجة لها , لكنها وجدت هنا وبقيت كأثر ورمز, توقفنا و توقفت الشاحنات و السيارات وكانت المكابح داءا لها
أما تلك العربة فلم تتوقف ليس لانها لا تحمل مكبحا بل لأن سائقها يمشي ورائها ولا يأبه بكل ما حوله من ضجة وكائنات غير مفهومة


تبا على اللغة وليس للغة ويالسعدي

الشحن العاطفي

في يوم العطلة وبعد أداء الواجبات التقليدية من افطار مع العائلة والجلوس على أحد البرامج الصباحية على احدى الفضائيات و تناول ما لذ و طاب على الغداء نجلس وراء شاشة التلفاز وتبدأ ساعة المشاهدة لقناة الجزيرة أو الأقصى ويبدأ الشحن العاطفي التدريجي و يزداد مع ازدياد صور الأخوات يبكين و الجثث هنا و هناك , لتصل قمتها عند رؤية أحد الرجال أو كل الرجال يبكون , لنبدأ بالاستغفار والدعوة وننتهي بالشتم على من له علاقة و من ليس له عللاقة و أخيرا نشتم أنفسنا حين نرى ذاك الطفل يقف وحيدا وجهه ملطخ بالدم لا يبكي لأنه ما زال مصدوما مما يجري أو حتى هو لا يعلم ماذا يجري أو ما جرى لعائلته ,

ربما يوقظنا من كل ذلك نداء الجوال من أحد الأخوة يعزمك على عرس ابنه فتبدأ بمجاملته و ما زال قلبك حزين على ما رأيت و تدريجيا مع تناول أطراف الحديث عن فلان و علتان تجد نفسك في السيارة و قد أدرت محركها و اتجهت لأحد المقاهي , فقد اتفقت معه على تناول الشيشة و من ثم العشاء

في عودتك تدير الراديو على احدى القنوات الأخبارية وعلى صوت نحيب أحد الجرحى أو الأشخاص أو نداءات الأستغاثة التي تسمعها من اللقاءات الحية , تعاود الأستغفار والتهليل , لتصل الى الشتم على من له علاقة و من ليس له علاقة و أخيرا تشتم نفسك عندما تسمع احد الرجال يصرخ اين عائلتي أين عائلتي بعد ان هدم عليهم المنزل

يوقظك من كل ذلك رنة أخرى للخلوي , ففي البيت يريدون خبزا للعشاء فتقف عند أقرب مخبز , وتأخذ الخبز و تعود أدراجك الى البيت , وتتحدث مع العائلة عن اليوم والغد وربما عن لغلاء و ما شهدتة في جولتك القصيرة , وبينما يقلب أحد من في الغرفة القنوات الفضائية باحثا عن أحد المسلسلات او التسلية , تصطدم بأحدى التقارير عن القطاع , احدى الطائرات الأسرائيلية تقصف وصور حية للقذائف تتساقط على القطاع فتعاود الأستغفار والتهليل , لتصل الى الشتم على من له علاقة و من ليس له علاقة و أخيرا تشتم نفسك عندما تشاهد القذيفة تدمر بيتا بأكمله

يوقظك من ذلك صوت الساعة التي تقول انها الحادية عشرة , هيا حان موعد النوم , اطفئ القطاع أو التلفاز والى الفراش بابتسامة مفكرا في جدول عملك للغد